ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន គ្រោងស្នើតែងតាំងលោក សួង សោភ័ណ្ឌ ជារដ្ឋលេខាធិការនៃទីស្ដីការគណៈរដ្ឋមន្ត្រីបន្ទាប់ពីលោកបានប្រកាសចូលរួមជីវភាពនយោបាយជាមួយនឹងគណបក្សប្រជាជន។

លោក សួង សុភ័ណ្ឌ បច្ចុប្បន្នគឺជាប្រធានគណបក្សខ្មែរឈ្នះ។

សម្ដេចតេជោ ហ៊ុន សែន បានសរសេរនៅលើ Channel Telegram របស់សម្ដេចថា៖ «ក្នុងនាមគណបក្សប្រជាជនកម្ពុជាខ្ញុំសូមស្វាគមន៍យ៉ាងកក់ក្តៅចំពោះលោក សួង សោភណ័ ដែលពេញចិត្តសុំមករួមជីវភាពនយោបាយជាមួយគណបក្សប្រជាជនកម្ពុជា។ ក្នុងនាមរាជរដ្ឋាភិបាលខ្ញុំនឹងស្នើសុំព្រះមហាក្សត្រចេញព្រះរាជក្រិត្យតែងតាំងលោកសួង សោភណ័ជារដ្ឋលេខាធិការទីស្តីការគណរដ្ឋមន្ត្រី»។

មួយរយៈចុងក្រោយនេះឃើញមានចលនានៃការចុះចូលជាមួយនឹងគណបក្សប្រជាជនជាបន្តបន្ទាប់ដែលកើតឡើងពីមន្ត្រីជាន់ខ្ពស់នៃគណបក្សក្រៅរដ្ឋាភិបាលនានា។ មន្ត្រីជាន់ខ្ពស់ទាំងនោះរួមមានលោក យ៉ង់ សាំងកុមារ លោក សាម អ៉ីន និងលោក សែម ហាក់ និងចុងក្រោយគឺលោក យឹម ស៊ីណន និងលោក ហ៊ុន កុសល។

គួរឲ្យដឹងផងដែរថាលោក សួង សោភ័ណ្ឌ គឺជាប្រធានគណបក្សខ្មែរឈ្នះដែលកើតចេញពីគណបក្សអំណាចខ្មែររបស់លោក សួន សេរីរដ្ឋា ដែលបច្ចុប្បន្នគឺជារដ្ឋលេខាធិការក្រសួងអភិវឌ្ឍន៍ជនបទបន្ទាប់ពីចុះចូលជាមួយបក្សប្រជាជនផងដែរ៕